Давсагны үрэвсэл буюу (Цистит) гэж юу вэ?
Давсагны үрэвсэл буюу (Цистит)
Цистит буюу давсагны үрэвсэл нь бөөр шээсний замд гаднаас нян бактери өгсөх замаар халдварлаж, үрэвсэл үүсгэдэг өвчин юм. Эрэгтэйчүүдэд харьцангуй бага тохиолддог бол эмэгтэйчүүдэд түгээмэл илэрдэг шалтгаан нь үтрээ шээсний сүвтэй ойрхон буюу хоёр эрхтэн бүтцийн хувьд ойрхон байрлалтай байдагтай холбоотой юм.
Шалтгаан
- Бактери шээсний сүвээр дамжин өгсөх замаар давсаг үрэвсэх
- Үтрээнд байгаа нян болон мөөгөнцрийн үрэвсэл нь шээсний амсарт очиж өгсөх замаар халдвар орох
- Гэдэсний савханцар /E-Coli/ нян шулуун гэдэснээс үтрээ болон шээсний сүв рүү халдварлах. Ихэвчлэн бэлгийн ариун цэвэр муу сахих, бие зассаны дараа буруу арчих зэргээс шалтгаалдаг
- Үтрээндээ үнэртэн бодис цацаж шээсний сүвийг цочроосноос болж үрэвсэл үүсэх
- Эмэгтэйчүүдийн төрөлтийн улмаас давсаг унжсантай холбоотойгоор давсаг үрэвсдэг.
Шинж тэмдэг
- Шээс ойр ойрхон хүрэх
- Дүлж шээх
- Бүрэн шээс чадахгүй, шээс үлдэх
- Зарим тохиолдолд халуурах
- Бие засахад хатгуулж өвдөх
- Шээсний өнгөнд өөрчлөлт орох буюу цустай шээх, шээс нь булингартай болох, хар цай шиг өнгөтэй болдог.
Хүндрэл
- Бөөрний халдвар авах
- Цустай шээс гарах
- Давсганд шархлаа үүсэх
- Давсагны хорт хавдар
Үрэвсэлийн үед дур мэдэн гэрээр антибиотик эмчилгээ эхлэхгүй байх ёстой. Халуун жин тавих нь шинж тэмдгийг бүдгэрүүлж, биеийн эсэргүүцэл суларвал өгсөх замын халдвараар бөөрөө гэмтээдэг.
Урьдчилан сэргийлэлт
Давсагийг үрэвсүүлэхгүй байхын тулд хувь хүний зүгээс дараах арга хэмжээг авч болно.Үүнд:
- Ус, шингэн зүйл тогтмол ууж байх
- Ойр ойрхон бие засч давсгаа бүрэн суллаж байх
- Хөөстэй баннанд орохоос илүүтэй шүршүүрт орох
- Бие зассаны дараа бэлэг эрхтнээ урдаас хойшоо чиглэлтэй арчих, дотогшоо оруулж угаахгүй, цэвэр усаар угаах
- Бэлгийн хавьтлын дараа бие засч байх
- Нөхөн үржихүйн насны эмэгтэйчүүд жилд нэг удаа эмэгтэйчүүдийн эмчид үзүүлэх
- Цангис, аньс жимсний шүүс уух. Энэ нь С амин дэмээр баялаг бөгөөд дархлааг дэмждэг.
- Сайн унтаж амрах.
